School Education Minister sawrkarin nasa taka a nawrna zarah scholarship sem ṭan a ni a ti

Dated Aizawl, 3rd October, 2025 : Higher & Technical Education leh School Education Minister Dr. Vanlalthlana chuan sawrkarin nasa taka a nawrna zarah scholarship sem ṭan a ni tih a sawi.
He thu hi vawiin (03/10/2025) a Mizo Zirlai Pawl (MZP) General Headquarters hruaitu tharte a pisaa a kawmnah sawiin Education Minister Dr Vanlalthlana chuan, kum 2023-24 chhunga mi chu sem zawh tawh a ni, a ti a. Kum 2024-25 chhunga mi pawh vawiinah 5000 vel sem chhuah hman tum a nih thu sawiin, sem bak pawh sem chhunzawm zel a nih tur thu a sawi. Aadhaar seeding la ti lote pawh an bank account-ah a luh vat theih nana buaipui tur ṭul buaipui vat turin a ngen nghal a ni. MZP-te nen thawhhona ṭha tak an neih a beisei thu sawiin, thawhpui atan a sawm bawk.
MZP hruaitu tharte hi Dr C. Lalremruata, President-in a ho a. MZP President chuan School Education Department leh Higher & Technical Education Department chu MZP tan nodal department a ni tiin, a department leh a changtu Minister phei chu zirlaite’n an inti neitu hle a ni, a ti. Zirna leh ram leh hnam thilah sawrkar chu tha takin an thawhpui dawn a ni, a ti a. A ṭul a nih chuan sawrkar dik lohna pawh sawi hreh an neih dawn loh thu a sawi bawk. MZP term thara hma lak an tum dan hrilhin, theih tawp chhuahpui turin Minister chu a ngen nghal a ni.