MCU hmalakna chungchang

MCU Khawzawl District chuan theihtawp chhuahin Khawzawl district chhungah consumer te dikna leh chanvo inzirtirna Consumer Awareness Programme an kalpui thin a, mipui (consumer) te tana hma an lakna hi thil chhinchhiah tlak tak leh pawimawh tak niin a lang a, District hrang hrang Consumer Union zingah leh Mizoram pum ang pawhin hma la chak leh nung ber nih hial a rinawm. He an hma lakna avang hian mipuite pawhin an dikna leh an chanvo an hriat phahin an tangkaipui ngei pawh a rinawm a, mipui tana hma an lakna hi chhunzawm reng thei se a duhawm tak zet a ni.
Thlirna tlang dang atangin han thlir erawh chuan, mihring tute pawh mai hi kil hrang hrang thai let thlai let a han inbih ralah chuan tumah hi mi tling, mi dik famkim kan awm hauh lova, that tawk lohna lai leh fel tawk lohna lai nei vek kan ni a, sumdawng, dawrkai, sorkar hnathawk te pawh mihring ve bawk an ni a, tih sual chang te, tih dik tawk loh te nei thei vek kan ni tih erawh kan inhriat sak a, inhriatthiam tawnna kan neih a tul a, chu chuan khawsakho a tinuam thin. Hemi kawngah hian Khawzawl MCU te pawh an fimkhur a tul hle a, mipui tana hma an lak lai hian mi dang tana huatthla la taka thil tih palh theih ve tho a nih avangin rilru fim tak nen hma lam pan zel thei se thil tha tak a nih a rinawm.