KHAWZAWL KVK-IN BIATE KHUA TOMATO CHING TURTE TAN TRAINING BUATSAIH

Khawzawl, the 20th April, 2026 : Vawiin khan KVK Khawzawl chuan KVK Training Hall-ah Biate khuaa tomato ching turte tan training an buatsaih.

Khawzawl KVK hian anmahni training hall-ah Biate khua totato ching tura hma la mek chhungkua 23-te tan hian tomato chin dan leh enkawl zirtirna an pe a. He hun hi Dr. Malsawmkimi, Senior Scientist & Head chuan kaihruaiin tomato ching tura hriat tur pawimawh leh a enkawl dan zirtirna a pe nghal a ni.
He training-a kalkhawmte hnenah tomato chi leh thlai chi hrang hrang Indian Institute of Horticulture Research (IIHR-NEH) Scheme hnuai atangin pek nghal an ni bawk.

KVK Khawzawl hian Tomato chinga hma late theihtawpin an pui thin a, kum 2015 ah Tuipui khua atangin hlawhtling takin bul an tan a, tun dinhmunah hian Khawzawl district chhunga khaw hrang hrangah tomato chinga hma la chhungkua thahnem tak awm tawhin heng mite hian eizawn nan ber an hmang chho mek a ni.