Khawzawl Times | Khawzawl, the 29th April, 2026 : Kumin 2026 chhungin Khawzawl District-ah Heroin leh Methamphetamine cheng nuai 1,175 leh sing 4 man hu man a ni tawh a, ND&PS hnuaiah case 7 ziahluh a ni tawh a, heng kaihnawihah hian mi 10 man an ni tawh bawk.
April ni 27, Thawhtanni khan Khawzawl District Bawrhsap Pu K.Vanlalthiana kaihhruaiin DC Conference Hall-ah April thla atan Khawzawl District NCORD thutkhawm neih a ni a. Pu K. Vanlalthiana chuan sawrkarin a phut angin Khawzawl districta thla tin NCORD thutkawm an nei thei chu lawmawm a tih thu a sawi a. Ruihhlo do leh drugs man kawngah Khawzawl Police leh Excise & Narcotics Department-te thawhrimna chu fakawm a tih thu a sawi a. Pu K Vanlalthiana chuan Mizoram district hrang hrang zingah Khawzawl chu kuhva rah tawlhruk man tam ber an ni tih tarlangin, kuhva rah tawlhruk hian kuthnathawkte eizawnna a tihbuai avangin a do kawngah theihtawp chhuah zel a pawimawh thu a sawi bawk a ni.
Khawzawl SP Pu F. Lalbiakzauva, NCORD Member Convener ni bawk hnen atangin Khawzawl district chhunga drugs man dan report ngaihthlak a ni a. Kumin 2026-ah hian ND&PS case 7 ziahluh tawh niin, heng kaihnawihah hian mi 10 man an ni a, Heroin gram 329, Rs. 65,80,000 hu leh Meth kg 13.87, Rs. 11,09,60,000 hu man a ni tawh a. Mizoram Liqour (Prohibition) Amendement Act, 2025 hnuaiah case 11 ziah luh tawh ni bawkin, NGO-te nen ruihhlo do kawngah thawhhona tha tak an nei tih a tarlang a ni.
Zuk leh hmuam do kawnga hmalaknate pawh ngaihthlak niin, zirna in bul hnaih, 100 yards (feet 300) chhung chu zuk leh hmuam fihlimna (TobaccoFree Zone) a ni a, he hmunah hian vaihlo thil hralh leh hman khap tlat a nih angin, Khawzawl district chhunga school hrang hrangahte 100 yard chin chhinchhiana ‘yellow line’ siam a ni a. April thla chhung hian Khawzawl Vengsang Presbyterian Kohhran NPSS-ah ruihhlo do awareness neih a ni dawn a, May thla-ah Biate khua-ah awareness nei tura ruahmanna siam a nih thu tarlan a ni bawk.
He hunah hian Khawzawl district chhunga drugfree village (ruihhlo awm lohna) atana thlan Tlangmawi khua chu ruihhlo lakah an fihlim ngei em tih endikna (joint inspection and verification) pawh May thla-a neih tura rel a ni. Khawzawl district hi Mizoram chhunga NCORD dedicated helpline number nei awm chhun a ni a, NCORD dedicated helpline number hi 8119080266 niin, ruihhlo kaihnawih thil reng rengah mipuite report thuai thin tura ngen an ni.
