District Level Wildlife Crime Control Sub-Unit ten nungcha leh ramngaw humhalhpui turin mipuite ngen

Khawzawl Times, 03th October, 2025 : Nungcha leh ram ngaw venhim leh humhalh chungchangah Pu F Lalbiakzauva, Chairman District Level Wildlife Crime Control Sub-Unit, Khawzawl District leh Superintendent of Police ni bawk chuan hriattirna a ti chhuak.

Pu F Lalbiakzauva’n hriattirna a tih chhuaha tarlan a nih dan chuan, kumin 2025 kum tawp kan hman chhoh mekah District Level Wildlife Crime Control Sub-Unit, Khawzawl District chuan mipuite nungcha humhalh kawnga thawhpuiah a sawm a. Kan rama nungcha leh ramngaw chereu zel tur venhim kawngah theihtawp chhuah a ni dawn a, silai nena ram vak thin te, Air gun leh thang hmanga sava kap a, awk thinte pawhin nungchate humhalh a, kan chin dan thalote ti tawh lo turin ngen an ni.

Silai nena ram vak, sava kap leh thang kam thinte chu The Wildlife (Protection) Amendment Act, 2022 Sec 51(1) hmangin cheng 100000/- (nuaih khat) chawi tir leh kum 3 aia rei lo lungin tan tir theih a ni. The Arms Rules, 2016 chuan Airgun chungchangah khuahkhirhna siamin, .22 (5.5mm) calibre muzzle energy 20 joules (15 ft-lb) chung lamte chu license ngai a ni a. License ngailo Airgun dangte pawh DC atangin Airgun permit neih vek tur a ni bawk a. License nei lova Airgun nei leh kengte chu Section 25(1B) (a) Arms Act hmanga case siam sak theih a ni a, License neih ngai lo, Permit neih ngai si, nei lo chu Arms Act, Section 30 hmanga case siam sak theih a ni bawk.

License emaw permit nei pawh ni se, ram sa leh sava kah nana Silai hmangte chu Section 30 of Arms Act leh Section 51 of Wildlife Protection Act hmanga case siam sak theih an ni tih tarlangin, kan tu leh fate tan kan ram rohlu nungcha leh ramngawte hi tichereutu ni lova, humhalhtu ni turin mitin te a ngen a ni.