Khawzawlah District Level Committee te Identification of Non-Notified Forest chungchang sawi hovin thukhawm

Khawzawl, dated 4th September 2025: Vawiin chawhnu dar 1 khan DC Chamber Khawzawlah, District Level Committee te Identification of Non-Notified Forest chungchang sawi hovin an thukhawm a, Khawzawl Bawrhsap Pu K. Vanlalthiana’n a kaihruai.

He hunah hian meeting hmasa lama an thu dahte bawzuina hrang hrang en ho niin, State Level Expert Committee-in kum 1997 a Affidavit hmanga Supreme Court-a Forest Conservation Act 1980 hnuaia humhalh Vantlang ramngaw tha “Non-Notified Tree Forests” pali; 1. Zawnghak, Rabung 2. Ngaizawl 3. Vankal Ngaw, Vankal leh 4. Bualphung Ngaw, Maite-te ground verification neih tawh chungchang te en ho a ni a. Khawzawl District chhunga heng Vantlang ramngaw tha humhalh bik pali ground verification report atanga a lan danin, 1997 Affidavit-a an zau zawng tarlan te aiin tun dinhmuna an zauzawng te an tlahniam nasa hle tawh a. Meeting chuan tun a an zau zawng dik tak, District Level Committee ground verification team leh khawtlang hruaituten an pawm tlan leh KML file an siam te hi pawm mai nise tiin an rel a, State Level Expert Committee ah pawh ground verification-a ram zau zawng hi report nise tiin an rel a ni. Tin, hei bakah hian Forest Conservation Act -1980 hnuaia humhalh tur ‘Non Notified Tree Forests’ thar rawtna awmte pawh GPS location leh KML file te nen an zir ho bawk a. Vantlang ramngaw humhalh tura rawtna panga lut zingah pathum te chu District Level Committee meeting chuan an pawm bawk a ni.

Bawrhsap, Pu K. Vanlalthiana chuan kalkhawm te chu an thahnem ngaihnaah fakin, thangthar leh zel tur an tu leh fa te tan vawiin thu rel hian rah tha a chhuah ngei a beisei thu a sawi.

He hunah hian Pu Suvigya S. Chandra, SDO(Sadar), IAS, Pu Lalbiakchama Chawngthu, Member Secretary, DFO Champhai bakah member dang-DRDO Revenue Dept, LAD representative leh khaw hrang hrang atangin VC leh YMA Branch aiawh te an tel a ni.