Khawzawl Times 3rd October, 2025 : Khawzawl District Consumer Union chuawn vawiin khan Khawzawl khawpui chhunga Gas Home Delivery kalpui dan chu a dik tawk lo nia sawiin, a tul anga hma la turin Khawzawl DC hnenah nganna an thehlut.
Khawzawl District Consumer Union chuan, FCS&CA Department Secretary thuchhuah angin kum 2022 December ni 1 atang khan The Marketing Discipline Guidelines 2022-in a sawi angin Aizawi Municipal Area leh District Headquarters-a LPG Distributor zawng zawng te Gas Home Delivery kalpui tur a ni a, Khawzawla LPG Distributor Mamawia Indane Agency chuan kum 2024 September ni 18 atangin Gas Home Delivery hi a hmingin an kalpui a, Veng/area ruatah chauh gas sem chhuakin LPG Home Delivery an kalpui a, khawpui chhung hmun danga customer ten gas hi mamawhin book ve mahse Gas an emna veng/area-ah chauh gas hi an deliver thin a ni an ti a.
Khawzawla Gas Distributor Mamawia Indane Agency-in LPG home delivery an kalpui dan chu The Marketing Discipline Guidelines 2022 bawhchhiatna leh mipuite dikna palzutna lian tak a nih avangin MCU Khawzawl chuan hei hi an ngai thutakin a rang thei ang bera hma la turin an ngen a ni.
MCU Khawzawl District hian Home Delivery chungchanga hmala tura ngenna hi Khawzawl DC a remchan loh avangin Additional DC, Pu K. Zorammuana hnenah nimin khan an thlen a ni.
Hetihlai hian Mamawia Indane Agency chuan MCU Khawzawl District ten DC hnenah an thu thlen chungchanga Khawzawl Times zawhna changa an sawi danin, veng/area bika gas an deliver laipawh ni se, veng dang atanga gas booking an awm a nih chuan an deliver vek zel tih an sawi a, record mumal taka an vawn thu leh an hnenah en theiha a awm thu an sawi bawk a ni. Heng bakah hian gas booking hi ni nga chhunga pek ngei tur a ni a, hei pawh hi Mizorama agency hrang hrang zingah a kalpui tha ber pawl an nih thu Mammawia Indane Agency chuan an sawi bawk a ni.
Share this news:
