Ruihhlo avanga buaina

Mizoram hi Myanmar leh Bangladesh International border-a awm kan nih avangin, tun hma lam zawnga kan buaipui luai luai ngai loh ruihhlo avanga harsatnain min chim buai hneh ta ang reng hle mai a. Kil tin atangin a do hna thawk viau mahila, pawi sak nei vaklo, an hlawk puina tur deuh chauh thlir, a tuar tute tawrh dan hrethiam lo lui deuh ngar ngar avangin he harsatna lian tak hian min chên chilh ta reng mai a. A vanduaithlak takzet a ni.
A zuar tute an demawm rual hian a ti thinte pawh hian an mimal nuna an tawrh dan leh an chenpui chhungkuate bakah thenawm khawvengte thlenga an tawrh theih dan hisap tha duh lovin an buaipui ve ngar ngar bawk a. A titu an buai a, a zuar an buai viau bawk a, a dona lam hawia ke pen mekte an buai bawk a. Ruihhlo avang hian kan phêk buai a ni ta ber mai a. Ngaihtuahna kan sên deuh deuh a hun leh zual ta hle a ni.
Heti renga kan ram hi ruihhlo avanga buainain min chim zui zel dawn a nih ngat chuan kan hma lam hun a êng lo viau a tih theih a. Ruihhlo do kawngah rilru fim tak pu chunga ngaihtuahna sên thar deuh deuh kan mamawh takzet tih i pawm ngam hrâm hrâm ang u.